Mkuu wa Wilaya ya Kibaha Amefanya Mkutano na Wananchi wa Mlandizi Kusikiliza na kutatua Kero

Posted on: January 29th, 2024

Mkuu wa Wilaya ya Kibaha Mhe.Nickson Simon amefanya mkutano wa kusikiliza kero za wananchi wa Mamlaka ya mji mdogo wa Mlandizi.

Akizungumza kwenye mkutano huo wa  Simon amewataka wazazi kupambania elimu kwa watoto wao kwani tayari Serikali imeondoa michango ya ada na  jukumu lililobaki kwa wazazi ni kuhakikisha watoto wanasoma.

"Wito wangu kwenu wazazi kupambania elimu za watoto, naomba mjitahidi kuwakamilishia mahitaji mengine,  kama unaweza kujibana ukanunua dera moja unaweza pia kujibana ukanunua kitabu, kama mnavyofuatilia tamthilia mnaweza pia kufatilia maendeleo ya watoto wenu, " alisema.

Kadhalika Mkuu huyo wa Wilaya alibainisha kwamba wanadhamiria kuazisha blocking farming na tayari wameshapata mashamba ekari 1500 na matrekta matatu na kuwa watahitajika vijana waliotayari kushiriki kwenye kilimo hicho kufika ofisini kwake.

Awali akijibu kero za wananchi Simon alimuagiza Mkuu wa Polisi  Mlandizi kuhakikisha wizi uliokithiri katika mji wa Mlandizi unakwisha ndani ya mwezi mmoja.

Alitoa maelekezo hayo baada ya kupokea kero kutoka kwa mmoja wa wananchi Said Hemed akilalamika kuwepo kwa uhalifu kwenye mji wa Mlandizi.

Katika hatua nyingine Mkuu huyo wa Wilaya aliwaahidi wakazi wa  Halmashauri ya Wilaya ya Kibaha kuwamba utaratibu wa kupata vitambulisho vya NIDA utarudiwa tena kwani imebainika wananchi wengi bado hawajapata huduma hiyo na hivyo wamejipanga kuongeza timu ya wataalam na bajeti.

 Ramadhani Mambote alimuomba Mkuu huyo wa Wilaya zoezi la uandikishaji wa Nida lirudiwe kwani wananchi wengi hawakupata huduma hiyo.

Naye Mwenyekiti wa Halmashauri ya Wilaya Kibaha  Mhe. Erasto Makala amemshukuru Rais wa Jamhuri ya Muungano wa Tanzania Samia Suluhu Hassan kwa kuidhinisha fedha nyingi kwenye Halmashauri hiyo na kufanikisha utekelezaji wa miradi ya maendeleo.

Pia amempongeza Mkuu huyo wa  Wilaya kwa maono yake ya kuanzisha block farming na tayari utekelezaji umeshaanza kwa kupata matrekta kutoka Serikali kuu.