MAFUNZO YA MFUMO WA TAUSI YAFANYIKA KIBAHA DC.

Posted on: September 17th, 2025

Halmashauri ya Wilaya ya Kibaha Leo Sept 17,2025  imeendesha mafunzo ya matumizi ya Mfumo wa TAUSI kwa watumishi kutoka kada mbalimbali ndani ya halmashauri hiyo, ikiwa ni jitihada za kuboresha ukusanyaji wa mapato ya serikali na kuongeza ufanisi katika utendaji kazi.

Akizungumza wakati wa kufungua mafunzo hayo, Bw. Daniel Mwita, ambaye ni Mhasibu kutoka Taasisi ya Serikali za Mitaa (TAMISEMI), amewahimiza watumishi kuhakikisha wanatumia mfumo huo ipasavyo kwa kufuata hatua na maelekezo yote yanayotolewa ili kuleta tija na ufanisi katika ukusanyaji wa mapato ya ndani.

"Mfumo huu ni nyenzo muhimu katika kuhakikisha tunadhibiti upotevu wa mapato na kuongeza uwazi katika shughuli za kifedha za halmashauri. Ni muhimu kila mtumishi anayepewa dhamana ahakikishe anaufahamu na kuutumia vizuri mfumo huu," alisema Bw. Mwita.

Kwa upande wake, Afisa Biashara wa Halmashauri hiyo, Bw. Ruben Urassa, alimshukuru Mkurugenzi Mtendaji wa Halmashauri, Bi. Regina L. Bieda, kwa juhudi zake za kuhakikisha watumishi wanajengewa uwezo wa kutumia mifumo ya kisasa ya TEHAMA katika ukusanyaji wa kodi na mapato mengine.

"Hatua hii ya kutoa mafunzo ni ya kupongezwa kwani itawawezesha watumishi kuongeza maarifa na weledi katika kutekeleza majukumu yao ya kila siku. Ni wazi kuwa matumizi ya mfumo wa TAUSI yatachangia kwa kiasi kikubwa katika kuongeza mapato ya halmashauri," alisema Bw. Urassa.

Mafunzo haya yanatarajiwa kuleta maboresho makubwa katika usimamizi wa mapato ya ndani ya halmashauri kwa kutumia teknolojia, sambamba na kuongeza uwajibikaji na uwazi kwa watumishi wa umma.