GEOFREY KAZINDUKI ACHAGULIWA TENA MAKAMU MWENYEKITI WA MAMLAKA YA MJI MDOGO MLANDIZI.

Posted on: September 24th, 2025

Baraza la Mamlaka ya Mji Mdogo wa Mlandizi kwa robo ya nne ya mwaka wa fedha 2024/2025 limefanyika leo tarehe 24 Septemba 2025, ambapo miongoni mwa ajenda kuu ilikuwa ni uchaguzi wa Makamu Mwenyekiti wa mamlaka hiyo.

Katika uchaguzi huo, wajumbe wa Baraza wamemchagua kwa mara nyingine Geofrey Kazinduki kuendelea kushika nafasi ya Makamu Mwenyekiti kwa kipindi cha mwaka mmoja ujao.

Akizungumza mara baada ya kuchaguliwa, Kazinduki aliwashukuru wajumbe wote kwa kuendelea kumuamini na kumpa nafasi ya kuongoza, huku akiwaahidi ushirikiano wa karibu na bidii katika kutekeleza majukumu ya maendeleo ndani ya mamlaka hiyo.

“Naahidi kushirikiana nanyi kwa dhati katika kuhakikisha tunaleta maendeleo na kuinua huduma kwa wananchi wetu wa Mlandizi,” alisema Kazinduki.

Naye Mwenyekiti wa Mamlaka ya Mji huo, John Pili, aliwataka wajumbe pamoja na wataalam kuendelea kushirikiana kwa karibu, akibainisha kuwa mshikamano huo ndio utakaosaidia kuinua mapato na kuharakisha maendeleo ya mji huo.

“Sisi wenyeviti ndio tunaishi na

 wananchi, tunazijua changamoto na fursa zilizopo kwenye biashara na ujenzi. Tukishirikiana kwa karibu, hakika tutafanikiwa kupandisha mapato ya Halmashauri yetu,” alisema Pili.

Baraza hilo limeendelea pia kujadili masuala mbalimbali yanayolenga kuimarisha ukusanyaji wa mapato na kuboresha huduma kwa wananchi wa Mji wa Mlandizi.