Madiwani wa Halmashauri ya Kibaha Wameliomba jeshi la Polisi Kuchukua Hatua kwa Watu Wanaojihusisha na Biashara ya Ngono

Posted on: June 8th, 2022

Madiwani wa Halmashauri ya Wilaya ya Kibaha wameliomba  Jeshi la Polisi kuchukua hatua kwa watu wanaojihusisha na biashara ya ngono ambayo inahatarisha mmomonyoko wa maadili kwa vijana wa wilaya hiyo

Akizungumza kwenye kikao cha Baraza la Madiwani Mwenyekiti wa Halmashauri hiyo Erasto Makala alisema biashara hiyo haramu inavunja utu wa Mtanzania hivyo hatua za kisheria zinatakiwa kuchukuliwa mapema kabla haijashamiri.

"Kupitia kikao cha Baraza hili tunaagiza hatua kali za kisheria zichukuliwe kwa wale wanaojihusisha na biashara hii , maeneo yanayotajwa kwenye wilaya yetu wahusika wadhibitiwe kwani inaenda kinyume na maadili yetu" alisema Makala.

Aidha alitaka wamiliki wa baa zinazodaiwa kuwa na watu wanaofanya biashara hiyo kuitwa na kuonywa lakini pia ellimu itolewe kwa vijana kuelezwa kuwa biashara hiyo inachangia maambukizi ya virusi vya ukimwi

Diwani Viti maalumu Halmashauri hiyo Josephine Gunda alisema wahusika wa biashara hiyo kwasasa wamehamia vijijini ambako wanatawanyika katika maeneo mbalimbali.

" Kuna maeneo ya vilabu ambayo pia watu wanauza sigara, bangi wapo wadada wanatumika kwa huduma za chap chap wanaenda kutuharibia watoto na mmomonyoko wa maadili kwa vijana wetu unaenda kutokea endapo hatua hazitachukuliwa mapema.

"Mchana wanashinda  wamelala kuanzia saa 12 wanaanza biashara hiyo makubaliano yanafanyika hadharani wakati watoto wetu wanakuwa bado wanaenda dukani hii ni hatari sheria zichukuliwe haraka" alisema

Madiwani wengine walichangia hoja hiyo kwa kusema kuwa endapo udhibiti hautafanyika mapema biashara hiyo itasababishia kupoteza vijana ambao ni nguvu kazi

Kupitia Baraza hilo Wazazi wamekumbushwa kutumia muda kukaa na watoto wao kwa kuwafundisha masuala ya makuzi na kuwaeleza kuhusiana na mambo ambayo hayana afya kwenye jamii na namna ya kuyaepuka lakini pia madhara yake endapo watajiingiza huko.