KIBAHA DC YAISHUKURU SERIKALI KWA VISHIKWAMBI VYA MAAFISA MIFUGO.

Posted on: October 10th, 2025

Mkurugenzi Mtendaji wa Halmashauri ya Wilaya ya Kibaha, Bi. Regina Bieda, ameishukuru Serikali ya Awamu ya Sita inayoongozwa na Mhe. Dkt. Samia Suluhu Hassan, Rais wa Jamhuri ya Muungano wa Tanzania, kwa kuwapatia Maafisa Mifugo vishikwambi vitakavyosaidia kuongeza ufanisi katika utendaji wa kazi za kila siku.

Akizungumza wakati wa makabidhiano ya vifaa hivyo, Bi. Bieda alisema vishikwambi hivyo vimekuja kwa malengo mahsusi, ikiwemo kuwezesha matumizi ya mfumo wa utambuzi wa wanyama, ambao utarahisisha ukusanyaji na uwasilishaji wa taarifa za mifugo kwa usahihi.

“Serikali haiwezi kupanga bila kuwa na takwimu sahihi. Hivyo ninawasihi Maafisa Mifugo kutumia vifaa hivi kikamilifu katika zoezi la uchanjaji wa mifugo na utoaji wa taarifa sahihi kila siku,” alisema Bi. Bieda.

Aidha, aliwataka maafisa hao kuonyesha bidii na uwajibikaji katika utekelezaji wa majukumu yao, huku akisisitiza umuhimu wa kila kata kutoa taarifa za maendeleo ya chanjo za mifugo kwa wakati.

Kwa upande wake, Afisa Mifugo wa Wilaya aliwataka maafisa mifugo wote kuhakikisha wanatunza vishikwambi hivyo na kuvitumia kwa kazi zilizokusudiwa, akibainisha kuwa vifaa hivyo ni sehemu ya juhudi za serikali kuboresha mifumo ya kidigitali katika sekta ya mifugo.

Wakizungumza kwa niaba ya wenzao, baadhi ya maafisa mifugo waliopokea vifaa hivyo waliishukuru serikali kwa kuona umuhimu wa kuwapatia vitendea kazi vya kisasa.

Francis Ekon, Afisa Mifugo wa Kata ya Ruvu, alisema vishikwambi hivyo vitawasaidia kuongeza tija katika utendaji wa kazi zao za kila siku,

Huku Evelyn Mutagwaba, Afisa Mifugo wa Kata ya Kilangalanga, akisema vifaa hivyo vitarahisisha upatikanaji wa takwimu sahihi na kurahisisha utumaji wa taarifa kwa wakati.