KIBAHA DC YAJIVUNIA USAJILI WA SHULE MPYA YA SEKONDARI MWAKAMO RUVU

Posted on: October 9th, 2025

Halmashauri ya Wilaya ya Kibaha kupitia Divisheni ya Elimu Sekondari imefanikiwa kusajili Shule ya Sekondari Mwakamo-Ruvu, iliyopo katika Kijiji cha Minazi Mikinda.

Shule hiyo imejengwa kwa gharama ya shilingi milioni 528.9, fedha zilizotolewa na Serikali Kuu .

Wananchi wa Halmashauri ya Wilaya ya Kibaha wameipongeza Serikali ya Awamu ya Sita inayoongozwa na Rais Dkt. Samia Suluhu Hassan kwa kuwaletea shule kubwa na ya kisasa yenye fani za ufundi, wakisema kuwa itakuwa mkombozi kwa watoto wao katika kupata ujuzi wa ajira na kujiajiri.

Akizungumzia mafanikio hayo, Mkurugenzi Mtendaji wa Halmashauri ya Wilaya ya Kibaha, Bi. Regina Bieda, amesema kuwa ujenzi na usajili wa shule hiyo ni hatua muhimu katika kuinua kiwango cha elimu wilayani humo.

“Tunaishukuru sana Serikali ya Awamu ya Sita kwa kuendelea kuwekeza katika elimu. Shule hii ya Mwakamo-Ruvu siyo tu kwamba itarahisisha upatikanaji wa elimu ya sekondari, bali pia itawaandaa wanafunzi wetu kupata ujuzi wa ufundi utakao wawezesha kujitegemea na kuchangia maendeleo ya taifa,” alisema Bi. Bieda.

Kwa upande wake, Afisa Elimu Sekondari wa Wilaya, Bi khadija Rajab, alisema shule hiyo itaanza kupokea wanafunzi mwanzoni mwa mwaka 2026, na tayari maandalizi ya walimu na vifaa vya kufundishia yanaendelea.

Kupitia mradi huu, Halmashauri ya Wilaya ya Kibaha inaendelea kutekeleza dhamira ya serikali ya kuhakikisha kila mtoto anapata elimu bora, jumuishi na yenye uelekeo wa ujuzi.