KWALA YAANDIKA HISTORIA MPYA, RAIS SAMIA AZINDUA SAFARI ZA MIZIGO SGR NA BANDARI KAVU MKOANI PWANl

Posted on: July 31st, 2025

Rais wa Jamhuri ya Muungano wa Tanzania, Mhe. Dkt. Samia Suluhu Hassan, leo ameandika historia mpya ya maendeleo kwa kuzindua rasmi safari za mizigo kwa kutumia reli ya kisasa ya SGR na kuagiza kuanza kutumika kwa Bandari Kavu ya Kwala ifikapo Agosti 4, 2025.

Akizungumza katika hafla hiyo, Mhe. Rais Samia amesema reli hiyo kutoka Dar es Salaam hadi Dodoma itapunguza muda wa safari, gharama za usafirishaji na msongamano jijini Dar es Salaam huku ikilinda mazingira. Mizigo sasa itafika Kwala kwa muda wa dakika 45 hadi saa 1 kutoka bandari ya Dar es Salaam na kufika Dodoma kwa saa nne hadi tano.

Rais Samia ametangaza kuwa serikali imewekeza shilingi bilioni 330.2 kwa ajili ya ununuzi wa mabehewa 1,430 ya mizigo ya SGR, huku akisisitiza kuimarishwa kwa vitengo vya biashara na ushirikiano na sekta binafsi ili kutumia kikamilifu miundombinu hiyo.

Aidha, ametaka huduma zote za kibandari zihamie Kwala kuanzia Agosti 4, 2025, ikiwa ni hatua ya kupunguza msongamano wa malori na kuongeza ufanisi wa Bandari ya Dar es Salaam.

Waziri wa Uchukuzi, Mhe. Prof. Makame Mbarawa, amesema Bandari Kavu ya Kwala itahudumia makasha zaidi ya 300,000 kwa mwaka na kuongeza ushindani wa bandari zetu, huku Waziri wa Viwanda na Biashara, Dkt. Selemani Jafo, akibainisha kuwa zaidi ya viwanda 200 vinatarajiwa kujengwa kwenye Kongani ya Viwanda ya Kwala.

Kwa upande wake, Rais Mstaafu Jakaya Mrisho Kikwete amempongeza Rais Samia kwa kazi kubwa anayoifanya kuiletea nchi maendeleo, huku Waziri wa Miundombinu wa Burundi, Mhe. Dieudonne Dukundane, akisisitiza kuwa Burundi imeanza ujenzi katika eneo lake la bandari kavu, ikiashiria ushirikiano wa kweli wa kikanda.

Mkuu wa Mkoa wa Pwani, Mhe. Abubakar Kunenge, amesema mkoa huo umeendelea kunufaika na miradi ya kimkakati ambapo viwanda vimeongezeka kwa kasi na kutoa maelfu ya ajira kwa wananchi.

Bandari Kavu ya Kwala na reli ya SGR ni sehemu ya mapinduzi makubwa ya miundombinu nchini yanayolenga kuifanya Tanzania kuwa kitovu cha biashara na usafirishaji katika ukanda wa Afrika Mashariki na Kati.