KUELEKEA SIKU YA WANAWAKE DUNIANI WANAWAKE WA KIBAHA WASHEHEREKEA SIKU YA WANAWAKE KWA KUTOA MSAA KWA WAZEE WENYE UHITAJI

Posted on: March 5th, 2024

MKUU  wa wilaya ya Kibaha Mhe.Nickson Simon amewapongeza wanawake wa  Halmashauri ya Wilaya ya Kibaha kwa kufanikisha kutoa msaada wa vyakula na mahitaji mbalimbali kwa wazee wa Halmashauri ya Wilaya hiyo.

Nickson ametoa pongezi hizo leo Machi 5, 2024 alipokuwa akizungumza kwenye  ukumbi wa wazee Mlandizi alipoongoza kutoa msaada kwa wazee wa Halmashauri hiyo wanaoishi kwenye mazingira magumu.

Akizungumza kwenye Hafla hiyo Nickson amewapongeza wazee hao kwa kufika umri walionao huku akisema uzee ni daraja lenye medali ya  juu huku akitoa wito jamii kuendelea kusaidia wazee wenye uhitaji katika maeneo yao

Nickson amesema Serikali ipo bega kwa bega na wazee kupitia programu ya kusaidia kaya maskini ambazo asilimia kubwa ni wazee.

Mkurugenzi mtendaji wa Halmashauri ya Wilaya ya Kibaha Regina Bieda amewaambia wazee hao kuwa Serikali inawatambua na inajua wamefanya kazi kubwa hivyo wanapokutana na changamoto wasisite kuwasiliana na ofisi yake.

Akizungumza kwa niaba ya Ofisi ya Mkuu wa Mkoa wa Pwani Roseline Kimaro amesema wazee ni kundi linalosahaulika na kwa mwaka huu kuelekea kielele cha siku ya wanawake duniani wanawake wa wilaya zote za mkoa huo wamejipanga kuwahudumia wazee kwa kuwapa mahitaji muhimu.

Rose amesema wadau mbalimbali walishirikishwa zikiwemo taasis za Serikali na wanajamii kupata mahitaji hayo ikiwemo unga,maharage, sukari, mafuta ya kupikia, sabuni za unga na mche, dawa za meno na mahitaji mengine.

Wanawake hao wamejipanga kuwafikia wazee 76 lakini kutokana na muitikio wa wadau wameweza kuwafikia wazee 96 kwa Halmashauri hiyo.

 '' Wekeza kwa Wanawake : Kuharakisha Maendeleo ya Taifa na Ustawi wa Jamii''

Akitoa shukrani baada ya kupokea misaada hiyo mmoja wa wazee hao Tukae Mzee Ramadhani amewashukuru wanawake hao kwa kujitolea misaada hiyo na muda wao huku akiwaombea kwa Mungu awafanukishe kwenye kazi zao za kila siku na kuwaomba waendelee kuwakumbuka wazee mara kwa mara.

Kauli mbiu ya wazee hao ni " wazee walikuwepo , tupo, wataendelea kuwepo kazi iendelee"