Kibaha Dc Imekabidhiwa Matrekta Matatu

Posted on: January 26th, 2024

MKUU wa Mkoa wa Pwani Abubakar Kunenge amesema Mkoa huo umeanza kutimiza adhma ya Rais Dk Samia Suluhu Hassan ya Tanzania kuilisha dunia kwa kwa kukabidhi matrekta kwa wakulima wanaofanya kilimo cha pamoja.

Kunenge ameyasema hayo leo wakati akikabidhi matrekta matatu kwa mkuu wa Wilaya ya Kibaha Nickson John yaliyotolewa na serikali kwa ajili ya wakulima wa Halmashauri ya Wilaya ya Kibaha.

Amesema kuwa Mkoa umeweka utaratibu wa kuhakikisha mabadiliko ya haraka yanaonekana na kuunga azma ya Rais ya kulisha nchi jirani na dunia ambapo ameonyesha nia ya dhati kwa kuweka mazingira mazuri ikiwa ni pamoja na kuweka wataalamu, vitendea kazi na vifaa kwa ajili ya kupitia udongo.

Aidha amipongeza Wilaya ya Kibaha kutenga eneo lenye ukubwa wa hekari 1,650 kwa ajili ya kilimo cha pamoja  cha mazao ya kilimo biashara na kuunganisha kilimo na viwanda kwa ajili ya kutoa ajira na kwa upande kilimo kiungane na uchumi wa buluu kupitia uvuvi na mifugo ambapo milioni zaidi ya 500 zimetolewa kwa ajili ya ranchi ndogo.

Naye Mkuu wa Wilaya ya Kibaha Nickson John amesema     wameanzisha kilimo cha pamoja ili kukabiliana na uharibifu wa mazingira kwa kuwaunganisha vijana kwenye kilimo badala ya kuchoma mkaa.

Mwenyekiti wa Halmashauri ya Wilaya ya Kibaha Erasto Makala ameishikuru Serikali kwa kuipatia Halmashauri Trekta hizo na amesema kuwa matrekta hayo yatachagiza wakulima kulima kwenye kilimo cha kibiashara.