Kero ya Shule Ruvu Mnazi Yatatuliwa na Mbunge wa Kibaha vijijini

Posted on: February 21st, 2024

WANANCHI wa Kitongoji cha Mnazi kilichopo Ruvu Halmashauri ya Wilaya ya Kibaha wameomba Serikali kuwatatulia kero ya watoto wao kutembea umbali wa Km sita kwenda shule kutokana na kukosa shule ya Msingi katika eneo lao.

Wamefikisha maombi hayo kwa Mbunge wa Jimbo la Kibaha Vijijini  Michael Mwakamo ambaye alifanya mkutano wake katika kitongoji hicho kusikiliza kero za wananchi

Walieleza kwamba kero yao kubwa ni ukosefu wa shule ya awali na msingi hali inayosababisha watoto wao wadogo kutembea umbali mrefu wa Km 6 kufuata elimu.

Akijibu kero hiyo Mwakamo aliwaambia tayari kero hiyo imeshapatiwa ufumbuzi kwani Halmashauri imeshapeleka  sh. milioni 40 kutoka mapato ya ndani kwa ajili ya ujenzi wa vyumba viwili vya madarasa.

Kutokana na hali hiyo Mbunge huyo  ameongeza sh. milioni 3.6 kutoka Mfuko wa jimbo huku akitoa wito kwa wananchi kusiimamia ujenzi wa madarasa hayo mawili kwa kuongeza nguvu kazi ili fedha hizo ziweze kutosha.

Akizungumza katika mkutano huo Mkurugenzi Mtendaji wa Halmashauri ya Wilaya ya Kibaha Regina Bieda aliwahakikishia wananchi hao kuwa madarasa hayo mawili tayari fedha imeshatolewa na kuwataka wananchi wafanye mkutano ili wachague kamati ya usimamazi ili mradi uweze kuanza.

Afisa elimu msingi aliwaambia wananchi hao wawaache watoto wao kuendelea kwenda shule na madarasa hayo yakikamilika wale wanafunzi wa darasa la kwanza watarudishwa kusoma kwenye shule shikizi.