Halmashauri ya Wilaya ya Kibaha Yavuka Malengo ya Ukusanyaji mapato

Posted on: November 23rd, 2023

Halmashauri ya Wilaya ya Kibaha Mkoani Pwani imevuka lengo la ukusanyaji wa mapato kwa asilimia 14 katika kipindi cha robo ya kwanza ya mwaka wa fedha 2023/2024.

Mwenyekiti wa Halmashauri hiyo, Mhe. Erasto Makala amesema kwa robo ya kwanza ya Mwezi Julai hadi September wameweza kukusanya mapato kwa asilimia 39.

Makala amebainisha hayo katika kikao cha Baraza la Madiwani  kilichofanyika katika Ukumbi wa Halmashauri  hiyo na kuhudhuriwa na wataalam na watendaji kutoka katika ngazi mbalimbali.

Hali kadhalika, Makala ametaka fedha hizo zitumike kama ilivyopangwa, yaani asilimia 40 ya mapato hayo yaende kwenye miradi ya maendeleo na asilimia 60 iende kwenye matumizi ya kawaida.

Amesema  miradi ya maendeleo itakayotekelezwa na mapato hayo ni miradi ya afya, elimu na barabara kwani bajeti ya TARURA ni finyu na haikidhi mahitaji ya wananchi; hivyo Halmashauri itatekeleza miradi mingine ya barabara.

Vilevile, ameeleza kwamba wataangalia vipaumbele vya wananchi kwa kwenda kuwaongezea nguvu kwenye miradi walioanzisha na haikukamilika.

Akizungumza katika Kikao hicho Diwani wa Kawawa, Mhe. Alfred Malega, ameitaka Halmashauri kwenda kutatua changamoto zinazowakabili wananchi kupitia fedha za mapato ya ndani ikiwemo kufungua barabara ambazo hazipitiki kwa sasa kutokana na mvua.

Malega amesema Kibaha vijijini inaenda kubadilika kutokana na uwekezaji mkubwa wa viwanda uliofanyika; hivyo Halmashauri  inatakiwa kuweka miundombinu vizuri.

Naye Gloria Mshindo, Diwani wa Viti Maalum amesema kuongezeka kwa mapato ni neema kwa wananchi wa Halmashauri hii kwani huduma za afya zinaenda kuboreshwa.

Awali, Mbunge wa Kibaha Vijijini, Michael Mwakamo alisema kwa mwaka wa fedha 2023/2024, vipaumbele kwenye fedha za Mfuko wa Jimbo ni ukamilishaji wa ofisi za vitongoji pamoja na  miradi ya Elimu na afya ambayo haijakamilika

Mwakamo amewataka Madiwani ambao wana mahitaji nje ya vipaumbele alivyovitaja, wasilete maombi kwa mwaka huu mpaka miradi iliyopo ikamilike.