Zahanati ya Mpiji Yafunguliwa Rasmi

Posted on: November 1st, 2022

Wananchi wa Kijiji cha Mpiji kata ya Bokomnemela, Wilaya ya Kibaha, Mkoa wa Pwani wamefurahia  ufunguzi wa Zahanati ya Kijiji hicho ambacho walianza ujenzi kwa nguvu zao hadi kufikia hatua ya boma ndipo Serikali Kuu ikawapatia  Shilingi milioni 50  na  Halmashauri ya Wilaya ya Kibaha ikawaongezea milioni 17 kutoka mapato ya ndani kwa ajili ya ujenzi wa vyoo.

Wakiongea katika Siku ya Afya ya Kijiji na Ufunguzi wa Zahanati hiyo, wananchi wa Kijiji cha Mpiji Station wameishukuru Serikali na viongozi mbalimbali kwa kufanikisha umaliziaji wa zahanati yao ambayo itakuwa mkombozi kwao kwani walikuwa wanatembea umbali mrefu kufuata huduma za afya huku mama wajawazito wakijifungulia njiani.

Vilevile, Mganga Mkuu wa halmashauri ya Wilaya ya Kibaha, Dkt Wilfred Kondo, amesema wamepokea watumishi wawili kutoka TAMISEMI ambao wamepangwa katika zahanati hiyo; hivyo basi, zahanati itaanza kutoa huduma za wagonjwa wa nje, mama wajawazito na huduma za maabara.

Akiongea wakati wa ufunguzi wa zahanati hiyo, Diwani wa Kata ya Bokomnemela, Paul Boniphace Maguhwa amesema Kijiji cha Mpiji Station kilikuwa na changamoto kubwa sana ya zahanati kwani waliwahi kushuhudia mama mjamzito akijifungulia mtoni kutokana na jiografia ya kijiji chao kutenganishwa na mto kwenda kijiji kingine. Kipindi cha mvua wananchi walikuwa wakipata shida sana.

Kutokana na changamoto hizo, waliamua kuanzisha ujenzi wa zahanati kwa kutumia nguvu zao hadi walipofikia hatua ya boma ambapo Serikali iliwasaidia kumalizia. Aliishukuru Serikali ya Awamu ya Sita kwa kuwajali wananchi wa hali ya chini.

Mwenyekiti wa Huduma za Jamii wa Halamshauri ya Wilaya ya Kibaha, Shomari Minshehe,   alisema kuwa Halmashauri ina mpango wa kusogeza huduma za afya kwa wanananchi; hivyo basi, ilibaini maeneo yote yenye changamoto za huduma ya afya mojawapo ni Kijiji cha Mpiji  na kuamua kupeleka fedha za kumalizia jengo ambalo lilianza kujengwa  kwa nguvu za wanannchi na kulikamilisha.

Minshehe alisema kuwa Halmashauri ina mpango wa kila kijiji kuwa na zahanati ili kuwaondolea wananchi kero ya kufuata huduma za afya mbali.

Aidha, mwenyekiti huyo aliwataka wananchi kuanzisha ujenzi wa nyumba za watumishi na Serikali itawaunga mkono ili watumishi hao wakae karibu na zahanati.

Shabani Kamunya, mwananchi wa Kijiji cha Mpiji Station amesema tangu uhuru wananchi wamekuwa wakipata changamoto kubwa sana ya afya. Wajawazito wengi wamejifungulia njiani kwani kijiji chao kipo pembezoni mwa wilaya, ndiyo maana waliamua kwa nguvu zao kuanza ujenzi wa zahanati yao hadi kufikia hatua ya boma bila malumbano. Pia, ameishukuru Serikali kwa kumaliza ujenzi wa zahanati yao na kuwaletea watumishi.

Saphia Seifu, Mwananchi wa Kijiji cha Mpiji Station amemshukuru Mhe. Samia Suluhu Hassan Rais wa Jamhuri ya Muungano wa Tanzania kwa kuwaonea huruma wanawake wenzake kupata zahanati kwani walikuwa wanapata adha sana ya huduma za afya.

Zahanati ya Mpiji Station imejengwa kwa nguvu za wananchi na kumaliziwa na fedha kutoka Serikali Kuu na Halmashauri. Zahanati imeanza kutoa huduma mbalimbali ikiwamo huduma za mama wajawazito kujifungua na huduma za maabara ambapo katika ufunguzi wananchi wamepewa huduma mbalimbali za afya  bure zikiwamo vipimo, chanjo  na ushauri wa lishe kwa wamama wajawazito na watoto huku wananchi wengine wakichangia damu.