WENYEVITI WA VIJIJI NA VITONGOJI WALIOCHAGULIWA WAAPISHWA LEO TAREHE 28/11/2019

Posted on: November 28th, 2019

Leo tarehe 28/11/2019 wenyeviti wa vijiji 26 na wenyeviti wa vitongoji 102 wameapishwa rasmi na Mhe. Nabwike Mbaba ambaye ni Hakimu mfawidhi, wakati wa kiapo hicho hakimu huyo aliwasisitiza viongozi hao kuzingatia sheria na taratibu za kazi katika kipindi chote cha utendaji wao. Hata hivyo aliwasisitiza zaidi kuhakikisha wanatenda haki kwa wananchi waliowachagua.

Aidha katika hafla hiyo fupi iliyofanyika katika ukumbi wa mama Ndesi ulioko katika mamlaka ya Mji Mdogo wa Mlandizi, walihudhuria viongozi mbalimbali akiwemo Mhe. Hamood Jumaa (Mbunge wa jimbo la Kibaha Vijijini), Mhe. Mansour Kisebengo (Mwenyekiti wa Halmashauri ya Wilaya ya Kibaha), Ndg. Ndalahwa Nuru Butamo ( Mkurugenzi Mtendaji wa Halmashauri ya Wilaya ya Kibaha) pamoja na vyombo vya Ulinzi na Usalama.

Viongozi wote hao waliwasihi viongozi waliochaguliwa kuzingatia mambo ya msingi yafuatayo:-

1. Kuzingatia sheria na taratibu katika uongozi wao

2. Wawe waaminifu na waadilifu

3. Wawe wabunifu hasa upande wa uibuaji wa Miradi ya maendeleo.

4. Wahakikishe wanaendana na kasi ya Mhe. Rais ya Tanzania ya Viwanda.

5. Wahakikishe wanatatua kero zote za wananchi kwa wakati.

6.  Watatue migogoro ya Wakulima na Wafugaji iliyopo katika maeneo yao.

7. Washirikiane katika utekelezaji wa majukumu yao ya kila siku ili kuongeza ufanisi wa kazi.

8. Wakubali kukosolewa kwani kuwa viongozi haimaanishi wanajua kila jambo.

Hata hivyo Viongozi hao waliahidi kulipa fadhila zao kwa kuwatumikia Wananchi kwa uwezo wao wote.

Mada mbalimbali zilitolewa na wataalam wa Idara ya Afya ,  Utumishi  na Utawala bora na Ardhi. 

 Kwa hakika Viongozi hawa wameandaliwa vyema kwenda kuwatumikia wananchi. 

Mungu ibariki Halmashauri ya Wilaya ya Kibaha Mungu ibariki Tanzania.