WENYEVITI MAMLAKA YA MJI MDOGO MLANDIZI WAHIMIZWA KUPELEKA MAENDELEO KWA WANANCHI NA KULINDA MIPAKA YA VITONGOJI

Posted on: June 5th, 2025

Baraza la robo ya tatu la Mamlaka ya Mji Mdogo Mlandizi kwa mwaka wa fedha 2024/2025 limefanyika leo Juni 5, 2025, katika ukumbi wa Halmashauri ya Wilaya ya Kibaha, ambapo wajumbe walijadili utekelezaji wa miradi ya maendeleo na kupata elimu kuhusu uendeshaji wa mamlaka hiyo.

Katika barazs  hilo, Mkuu wa Idara ya Utawala na Rasilimali Watu, Edward Masona, alitoa elimu kwa wajumbe kuhusu taratibu za uendeshaji wa mamlaka ya mji na mchakato wa kuifikisha Mlandizi kuwa Halmashauri ya Mji.

 Elimu hiyo ilitolewa kufuatia maswali kutoka kwa wajumbe waliotaka kujua hatua za kufuata kufanikisha azma hiyo.

Akizungumza kwenye baraza hilo  Katibu wa Chama cha mapinduzi (CCM)  Halmashauri ya Wilaya ya Kibaha ,Ole  Ezekiel Mollel aliwataka wenyeviti wa Mamlaka ya Mji Mdogo Mlandizi kuhakikisha wanawapelekea wananchi maendeleo kama walivyoaminiwa na chama hicho.

“Chama kimewaamini. Pelekeni maendeleo kwa wananchi. Jukumu lenu ni kushirikiana na watendaji wa serikali kuleta maendeleo, hasa kipindi hiki serikali ya awamu ya sita chini ya Mheshimiwa Samia Suluhu Hassan inaleta fedha nyingi sana za miradi,” alisema Ole.

Kwa upande wake, Mkurugenzi Mtendaji wa Halmashauri ya Wilaya ya Kibaha, Bi. Regina Bieda, aliwahimiza wenyeviti hao kufanya kazi kwa kujiamini kwani wamechaguliwa na wananchi kwa imani kuwa wataweza kutatua changamoto zilizopo.

“Wenyeviti mmekuwa chombo muhimu kwenye vitongoji vyenu. Ninyi ndio wakurugenzi, Ma DC, maafisa ustawi wa jamii na wengineo. Pokeeni wananchi, wasaidieni na waelekezeni sehemu sahihi za kupeleka changamoto zao,” alisema Bi. Bieda.

Aidha, aliwataka kulinda mipaka ya vitongoji vyao ili visivamiwe na wilaya nyingine, kuimarisha usafi ndani ya mji mdogo wa Mlandizi na kusimamia kikamilifu ukusanyaji wa mapato ya serikali kwa ajili ya kuharakisha maendeleo.

Katika kikao hicho, katibu Vijana wa Chama Cha Mapinduzi (UVCCM)Godfrey Dzombe  aliwasisitiza viongozi hao kuboresha mahusiano na watendaji wa serikali, akieleza kuwa mahusiano mazuri ni njia muhimu katika kufanikisha maendeleo