Wananchi Wametakiwa Kuendelea Kuzingatia Kanuni za Afya

Posted on: July 26th, 2020

Wananchi wametakiwa kuchukua tahadhari za magonjwa ya mlipuko kama Corona  kwa kuendelea kuzingatia kanuni za afya ikiwemo kunawa mikono kwa maji tiririka na sabuni .

Hayo yamesemwa na timu ya wataalam kutoka kitengo cha Elimu ya afya  kwa umma cha Wizara ya Afya wakishirikiana na wataalam wa mkoa na chama cha msalaba mwekundu Tanzania walipoendesha kampeni ya siku tatu ya kuelimisha na kuhamasisha jamii kuendelea  kuzingatia kanuni za usafi ili kuepuka kupata magonjwa ya mlipuko kama corona, kipindupindu.

Kampeni hiyo inaenda sambamba na msisitizo wa kupeleka watoto walio chini ya miaka mitano kliniki pamoja na kuhamasisha wananchi kuwa na bima ya afya CHF iliyoboreshwa .

Akiongea wakati wa kampeni hiyo Ofisa kutoka kitengo Cha Elimu ya afya kwa Umma Cha Wizara ya afya Maendeleo ya Jamii Wazee na Watoto Orsolina Tolage alisema, kampeni hiyo inafanyika katika maeneo mbalimbali hapa nchini.

Tolage alisema, katika kampeni hiyo waratibu ngazi ya Halmashauri watakuwa wanahamasisha pia wazazi na walezi kupeleka watoto wao kliniki kupata chanjo, kwani katika kipindi cha mlipuko wa ugonjwa wa Corona wengi walisitisha kwenda kliniki.

Aidha alisisitiza wananchi kuendelea kufuata kanuni na udhibiti wa afya kama ilivyo katika kipindi Cha ugonjwa wa Corona.

Kampeni hiyo inafanyika katika maeneo yenye mikusanyiko ya watu ikiwa ni pamoja na shuleni, sokoni na stendi ili kuufikisha ujumbe kwa urahisi.