Wakuu wa Mkoa wa Pwani Ametoa Onyo Kali kwa Wafugaji Wanaotumia Watoto Kuchunga Mifugo

Posted on: February 13th, 2019

MKUU WA MKOA WA PWANI ATOA ONYO KALI KWA WAFUGAJI WANAOTUMIA WATOTO KUCHUNGA MIFUGO.

Mkuu wa Mkoa wa Pwani Mhe. Evarist Ndikilo amekemea  vikali tabia ya wafugaji kuwatumia watoto wadogo kuchunga mifugo na kuwanyima haki yao ya kusoma.

Ndikilo ameyasema hayo alipokuwa kwenye ziara ya kikazi katika Halmshauri ya Wilaya ya Kibaha kata ya Magindu.

Akiongea na wananchi kwenye Mkutano wa hadhara Mkuu wa Mkoa aliwataka wafugaji kuacha mara moja kuwatumia watoto wadogo kwenye kuchunga mifugo kwani watoto hao hawana uwezo wa kulinda makundi ya mifugo hivyo mifugo huwashinda na kwenda kushambulia mazao mashambani , badala yake Mkuu wa Mkoa amewataka kuwapeleka watoto hao shule.

Vilevile Ndikilo amewaagiza watendaji wa Vijiji kupita katika kaya na kuorodhesha watoto ambao wanatakiwa kwenda shule lakini hawajapelekwa ili wazazi wao wachukuliwe hatua za kisheria.

pamoja na hayo Ndikilo amewataka wafugaji na wakulima kuheshimiana kwenye maeneo yao kwani hakuna aliyebora zaidi ya mwingine na kuwataka wafugaji waache mara moja tabia ya kulisha mifugo kwenye mashamba ya mazao.

Hata hivyo Mkuu wa Mkoa amemtaka Mkurugenzi  Mtendaji kusimamia mpango wa matumizi bora ya ardhi kwenye vijiji vya Magindu, Lukenge na Mzimuni ili kuepusha migogoro ya ardhi.

Wananchi wa Magindu wamemshukuru Mkuu wa Mkoa kwa kufanya ziara na kusikiliza kero zao kwani migogoro ya ardhi kwenye maeneo yao yamekithiri na hadi kupelekea uhaba wa chakula kwani wafugaji wamekuwa wakifungulia mifugo kwenye mashamba yao.