Waendesha Bajaji Washiriki Usafi, Wajipanga kwa Uchaguzi wa Serikali za Mitaa

Posted on: November 11th, 2024

Waendesha bajaji wa Halmashauri ya Wilaya ya Kibaha wamefanya zoezi la usafi leo, Novemba 7, 2024, katika ofisi za halmashauri hiyo, wakionesha mshikamano na jitihada za kuboresha mazingira.

Akizungumza katika zoezi hilo, Mkurugenzi Mtendaji wa Halmashauri ya Wilaya ya Kibaha, Regina Bieda, aliwashukuru waendesha bajaji kwa kujitoa kusafisha mazingira. Aidha, aliwahamasisha kushiriki kikamilifu katika uchaguzi wa serikali za mitaa unaotarajiwa kufanyika Novemba 27, 2024.

Kiongozi wa chama cha waendesha bajaji alisema kuwa wako bega kwa bega na halmashauri hiyo na wamedhamiria kushiriki kwenye uchaguzi huo kwa kuchagua viongozi watakaofanya nao kazi kwa karibu. "Tunaamini viongozi wa ngazi za chini ndio wenye mchango mkubwa katika maendeleo yetu ya kila siku," alisema.

Vilevile, waendesha bajaji hao wamewataka vijana wenzao kutambua umuhimu wa tarehe 27 kwa kutumia nafasi hiyo kuchagua viongozi wenye uwezo wa kuleta maendeleo ya kweli katika jamii.