Rc Pwani Aridhishwa na Ujenzi wa Majengo Matano Kituo cha Afya Magindu

Posted on: February 9th, 2019

RC PWANI ARIDHISHWA NA UJENZI WA MAJENGO MATANO KITUO CHA AFYA MAGINDU

Mkuu wa Mkoa wa Pwani Mhandisi Evarist Ndikilo amekagua ujenzi wa Kituo cha afya Magindu na amempongeza Mkurugenzi  Mtendaji wa halmashauri ya Wilaya ya Kibaha  kwa kusimamia vizuri  ujenzi wa majengo hayo yaliyojengwa na kukamilika kwa milioni 500 kwani majengo hayo yamejengwa kwa kiwango kinachoridhisha na kumtaka  Mkurugenzi huyo kukamilisha shimo la maji taka ili kituo hicho kianze kutoa huduma kwa wananchi.

Mkuu wa Mkoa ameyasema hayo alipokuwa kwenye ziara ya siku moja kwenye Halmashauri ya Wilaya ya Kibaha akiwa lengo  la  kukagua miradi ya maendeleo na kuongea na wananchi .

Pamoja na hayo Mkuu wa Mkoa aliwataka watumishi wa afya kufanya kazi kwa bidii na kuacha visingizio na maneno ya kejeli kwa wagonjwa na badala yake wawahudumie wagonjwa hao kwa upendo. Ndikilo aliwaambia watumishi hao hatasita kuwachulia hatua za nidhamu kwa watakao kwenda kinyume na maadili ya kazi yao.

Aidha Mkuu wa Mkoa amewataka wakulima na wafugaji kuheshimiana kwenye maeneo yao na wafugaji waache mara moja tabia ya kuchungia mifugo yao kwenye mashamba ya wakulima na kuwaagiza watendaji wa kata na vijiji kuwaripoti wafugaji wanaolisha mifugo kwenye mashamba ya wakulima ili waweze kuchukuliwa hatua za kisheria.

Sambamba na hilo Rc amewataka wafugaji kuacha kutumia watoto wadogo kuchunga mifugo kwani wanawanyima watoto haki yao ya msingi ya kupata elimu hivyo Rc amewataka watendaji wa vijiji kupita kwenye kaya na kubaini watoto wenye umri wa kwenda shule lakini hawaendi shule.