RC Aingilia Kati Mgogoro Dutumi

Posted on: September 27th, 2018

MKUU wa Mkoa wa Pwani Mhandisi Evarist Ndikilo ameingilia kati mgogoro kati ya uongozi wa Kijiji cha Dutumi wilaya ya Kibaha na baadhi ya wajumbe wa Serikali ya Kijiji na wananchi

Mgogoro huo ambao umedumu kwa zaidi ya miezi saba walalamikaji walifikia hatua ya kumuamdikia rais barua kumielezea tuhuma za mwenyekiti wao Mkali Kanusu.

Kutokana na hali hiyo imemlazimu mkuu wa mkoa kuingilia kati na kuunda kamati ya watu watano ambao watafanya uchunguzi wa tuhuma za mwenyekiti na ikibainika hatua ziweze kuchukuliwa.

Akiongea na wananchi wa Kijiji cha Dutumi jana Mhandisi Ndikilo alisema, shughuli za maendeleo katika Kijiji hicho zimesimama kwa muda mrefu hivyo kamati hiyo italazimika kufanya kazi haraka ili ufumbuzi utafutwe kwa watakaobainika kuwa na tuhuma.

Kamati iliyoundwa ni pamoja na Kamanda wa polisi, Taasisi ya kuzuia na kupambana na Rushwa (TAKUKURU), Mwanasheria, Ofisi ya Usalama wa Taifa (RCO) na mwakilishi kutoka ofisi ya mkuu wa Wilaya ya Kibaha.

Alisema kamati hiyo itafanya kazi ndani ya siku saba ikibaini kuwa mwenyekiti ana tuhuma za kujibu, Mtendaji wa Kijiji atamuandikia mkuu wa Wilaya barua ambae nae ataandika barua kwa mwenyekiti wa Kijiji ambae atapewa muda wa kujibu baada ya majibu hayo Mkuu wa mkoa atatoa maelekezo kwa Serikali ya Kijiji.

Katika barua iliyoandikwa na baadhi ya wananchi hao kwenda kwa Rais John Magufuli ilieleza kuwa mwenyekiti anatuhumiwa kuhusika na ubadhilifu wa fedha, kupokea wawekezaji tofauti na waliopitishwa, lakini pia barua hiyo ilimtuhumu mbunge wa Kibaha Vijijini kuhusika na tukio la kupiga risasi tano hewani kuwatisha wananchi.

Barua hiyo ilieleza kuwa siku moja kabla ya mahojiano na maofisa wa TAKUKURU ndipo usiku ilisikika risasi zikipigwa hewani ambazo walihofia ni za kuwatisha wananchi wasijitokeze kutoa ushirikiano dhidi ya tuhuma za mwenyekiti wao kwenye ubadhilifu wa fedha za Kijiji.

Hata hivyo Mhandisi Ndikilo alisema, tuhuma hizo zimeanza kufanyiwa kazi na Jeshi la Polisi ikibainika hatua za kisheria zitachukiliwa.

Aidha alisema, ikibainika tuhuma ni za uongo wahusika watachukuliwa hatua, aliwaomba pia wananchi kuhakikisha wanatoa ushirikiano kwa kamati hiyo ili kurahisisha zoezi.

Mwenyekiti wa Kijiji hicho Mkali Kanusu alisema, hahusiki na tuhuma hizo na badala yake ni njama za kikundi cha watu wachache ambao wanalenga kumchafua, hata hivyo ameahidi kutoa ushirikiano kwa kamati iliyoundwa pale itakapomhitaji.

Mmoja wa wannchi hao Said Muhode alisema baadhi ya wajumbe wa Kijiji wamekua chanzo cha mgogoro katika Kijiji hicho.

Abdalla Mwinyimvua alisema, wawekezaji waliopo sio waliopitishwa hali inayoendeleza migogoro katika Kijiji hicho.

Kijiji hicho mgogoro wake ulianza kutatuliwa na mkuu wa Wilaya ya Kibaha Assumpta Mshama na baadae mkuu wa mkoa kuingilia kati baada ya kuona baadhi ya shughuli zinakwama kutikana na kutokua na maelewano kati ya mwenyekiti na baadhi ya wajumbe wa kamati ya Kijiji.