MKUU WA WILAYA YA KIBAHA MHE.NICKSON SIMON, AMEWATAKA MADIWANI KWENDA KUKAGUA MIRADI NA SIO KWENDA KUTEMBELEA MIRADI

Posted on: August 21st, 2024

MKUU  wa Wilaya ya Kibaha, Mhe. Nickson Simon amewataka Madiwani wa Halmashauri ya Wilaya hiyo kuwa na tabia ya kukagua miradi na siyo kwenda kutembelea.

Nickson ameyasema hayo leo Agosti 21, 2024 kwenye kikao cha Baraza la Madiwani wa Halmashauri ya Wilaya ya Kibaha la kujadili taarifa za robo ya nne, Aprili mpaka Juni, 2024.

"Nendeni mkakague miradi siyo kutembelea; anayekagua, ataangalia ramani inasemaje; na atahoji kila hatua ya ujenzi, tofauti na anayetembelea; akifika anaangalia na kuondoka." amesisitiza Nickson.

Mkuu huyo wa Wilaya ya Kinaha amewakumbusha Madiwani  kuwahimiza wananchi kushiriki uchaguzi wa Serikali za Mitaa utakaofanyika Novemba 2024.

Kwa upande wake Mwenyekiti wa Halmashauri ya Wilaya ya Kibaha, Mhe. Erasto Makala ametoa maelekezo kwa idara ya kilimo kuendesha sensa ya mbwa wote waliopo ndani ya Halmashauri na kuwa na takwimu za mbwa waliochanjwa.

Sambamba na hiyo, Mhe. Makala aliagiza kutafutwa wazabuni watakaoendesha zoezi la kutoa chanjo ya mbwa na wananchi kuchangia kwani Halmashauri haina uwezo wa kuendesha zoezi hilo.

Vilevile, ametaka kuteketezwa mbwa wote wanaozurura mitaani amboa hawana wamiliki kwani wamekuwa wakileta madhara kwa wananchi.

Naye Makamu Mwenyekiti wa Halmashauri aliyemaliza muda wake, Mhe. Shomari Minshehe amesema kwa kipindi  cha mwaka mmoja akiwa Mwenyekiti wa Kamati ya Ukimwi waliweza kutoa elimu kwa wananchi jinsi ya kujikinga na ugonjwa huo.

Mhe. Shomari ameongeza kuwa kutokana na elimu hiyo, wameweza kupunguza maambukizi ya ugonjwa huo kutoka asilimia 7.5 hadi asilimia

Katibu wa Chama cha mapinduzi Kibaha Vijijini, Steven Shija amewataka madiwani na wataalam kwenda kusimamia miradi ya maendeleo ili iweze kuleta matokeo chanya kwa wananchi.

Shija amesema Chama cha Mapinduzi wataendelea kusimamia kwa weledi miradi hiyo, lengo likiwa ni kuleta matokeo chanya kwa wananchi.

Aidha, Shija ametoa msisitizo kwa Madiwani  kutoa ushirikiano kwa watumishi wanapotekeleza majukumu yao na wasiwe sababu ya kuwakwamisha.