MKURUGENZI WA HALMASHAURI YA WILAYA YA KIBAHA ATOA WITO KWA MADIWANI KUHAMASISHA UANDIKISHAJI WA WAPIGA KURA

Posted on: February 5th, 2025

Mkurugenzi Mtendaji wa Halmashauri ya Wilaya ya Kibaha, Regina Bieda, amewataka Madiwani kuhamasisha wananchi kujitokeza kwa wingi kujiandikisha kwenye Daftari la Wapiga Kura, ikiwa ni maandalizi ya uchaguzi ujao. Zoezi hilo linatarajiwa kuanza Februari 13 hadi 19 mwaka huu.

Bieda alitoa wito huo leo, Februari 6, wakati wa kikao cha Baraza la Madiwani kilichofanyika katika ukumbi wa Halmashauri hiyo. Amesema ni muhimu kwa Madiwani kuhakikisha wananchi wanajitokeza kwa wingi kujiandikisha, hasa walengwa wakuu wa zoezi hilo, wakiwemo waliofikisha umri wa miaka 18, wale waliohama makazi, pamoja na waliopoteza au kuharibikiwa na vitambulisho vyao vya kupigia kura.

Aidha, Bieda alizungumzia hali ya ufaulu wa wanafunzi wa elimu ya msingi katika Halmashauri hiyo, akibainisha kuwa matarajio ni kupata matokeo mazuri zaidi mwaka huu. Alisema mwaka uliopita, Halmashauri ya Kibaha ilishika nafasi ya tatu kimkoa, na lengo kwa mwaka huu ni kupanda zaidi katika msimamo huo.

"Tunajipanga kuhakikisha tunaendelea kuinua viwango vya elimu kwa kushirikiana na wadau mbalimbali ili kuboresha mazingira ya kujifunzia na kufundishia," alisema Bieda.