MKURUGENZI MTENDAJI KIBAHA DC AFUNGUA MAFUNZO KWA WATUMISHI WA AFYA AJIRA MPYA: AWATAKA WATOE HUDUMA KWA WELEDI NA KUFUATA MAADILI

Posted on: June 16th, 2025

Mkurugenzi Mtendaji wa Halmashauri ya Wilaya ya Kibaha, Bi. Regina Bieda, leo Juni 16, 2025, amefungua rasmi mafunzo ya siku moja kwa watumishi wapya wa kada ya afya, ambapo amewataka kufanya kazi kwa bidii huku wakizingatia nidhamu, uadilifu na kuzingatia sheria, taratibu na kanuni za utumishi wa umma.

Akizungumza wakati wa ufunguzi wa mafunzo hayo yaliyofanyika katika ukumbi wa Halmashauri, Bi. Bieda amesisitiza umuhimu wa kutoa huduma bora kwa wagonjwa kwa kutumia lugha nzuri, kuwapa faraja na kuwa na moyo wa kuwajali bila kujali hali ya mtu au uwezo wake wa kifedha.

"Toeni huduma kwa upendo na kwa usawa. Nendeni mkawa mfano wa utumishi wa umma unaozingatia maadili. Jiepusheni na ulevi uliopitiliza na mjikite kwenye kutumikia wananchi kwa moyo wa kujituma," amesema Bi. Bieda.

Afisa Utumishi wa Halmashauri hiyo, Bw. Edward Masona, amewakumbusha watumishi hao wapya kuwa nidhamu kazini ni jambo la msingi na wanapaswa kuwa na heshima kwa viongozi wao pamoja na kutoa huduma kwa wagonjwa kwa weledi.

Kwa upande wake, Mganga Mkuu wa Halmashauri, Dkt. Wilford Kondo, amewataka watumishi hao kufuata kikamilifu maadili ya taaluma ya afya na kuepuka vitendo vyote vya rushwa, akieleza kuwa kosa la rushwa halina msamaha.

"Sitavumilia kuona mtumishi wa afya anakosa kufuata maadili ya taaluma ya afya. Hakikisheni mnatoa huduma bora kwa kila mgonjwa na kuzingatia miongozo ya kitaaluma," amesema Dkt. Kondo.