MBUNGE WA KIBAHA VIJIJINI AFANYA ZIARA YA KUKAGUA MIRADI YA MAENDELEO.

Posted on: September 11th, 2024

Mbunge wa Jimbo la Kibaha Vijijini, Mhe. Michael Mwakamo, alifanya ziara ya kikazi katika jimbo hilo leo, Septemba 10. Katika ziara hiyo, alitembelea Kata za Kilangalanga na Kawawa ambapo alikagua miradi mitano ya maendeleo ikiwemo ujenzi wa uzio wa Halmashauri ya Wilaya ya Kibaha, kantini, bweni la wanafunzi wenye mahitaji maalumu, hospitali ya wilaya na maktaba ya kilimo. Mhe. Mwakamo alianza ziara yake kwa kukagua mradi wa uzio na kantini ya Halmashauri yenye thamani ya Shilingi milioni 207 ambapo ujenzi umefikia asilimia 85.5 kulingana na taarifa ya mkandarasi. Alimhimiza Mkandarasi na Afisa Mipango wa Halmashauri kuhakikisha mradi wa nyumba za watumishi unakamilika kwa wakati ili watumishi pamoja na Mkurugenzi wa Halmashauri waweze kuhamia mapema. Akiwa katika Kata ya Kilangalanga alikagua mradi wa Kituo cha Mafunzo ya Kilimo ambacho kinatarajiwa kutoa huduma za maktaba ya kilimo na shughuli nyingine za kilimo katika Halmashauri hiyo kwa lengo la kuimarisha sekta ya kilimo. Mganga Mkuu wa Halmashauri ya Wilaya ya Kibaha, Dkt.  Wilfred Kondo alipokea maelekezo kuhusu uboreshaji wa hospitali ya wilaya ambapo Mhe. Mwakamo alitembelea jengo la kuhifadhi maiti, jengo la wazazi na kupokea ripoti fupi kutoka kwa daktari huyo. Mhe. Mwakamo alishauri viongozi wa hospitali hiyo kwenda kujifunza kutoka Halmashauri ya Wilaya ya Kongwa kuhusu jinsi ya kuboresha mazingira ya hospitali. Ziara hiyo ilihitimishwa kwa kikao kifupi na wananchi katika eneo la Shule ya Sekondari Disunyara ambapo Mhe. Mwakamo alizungumza na wananchi na viongozi wa Halmashauri ya Kibaha.