MAPATO KIBAHADC YAONGEZEKA KWA ASILIMIA 8.5

Posted on: August 28th, 2024

Mapato   KibahaDc  Yaongezeka  kwa asilimia 8.9%.

Halmashauri ya Wilaya ya Kibaha imefabikiwa kuongeza mapato katika mwaka wa fedha 2023/2024, baada ya mapato yake kuongezeka kwa asilimia 8.9% ikilinganishwa na mwaka uliotangulia.

Ongezeko hilo limechangia kwa kiasi kikubwa katika kuendeleza miradi ya maendeleo, hususan ujenzi wa soko la kisasa linalojengwa  eneo la Mlandizi.

Taarifa hiyo imetolewa Agosti 28, 2024, na Mweka Hazina wa Halmashauri hiyo, Zubeda Nkala, wakati wa kikao maalumu cha Baraza la Madiwani la kujadili ufungaji wa hesabu za mwisho wa mwaka 2023/2024.  

Kwa mujibu wa Nkala ongezeko hilo la mapato ni matokeo ya usimamizi bora wa fedha uliofanywa na Mkurugenzi Mtendaji wa Halmashauri,Regina Bieda.

Pamoja na mafanikio hayo, Nkala amebainisha kuwa Halmashauri bado inadai fedha kutoka taasisi na idara mbalimbali za serikali.

Kutokana na hali hiyo  Mwenyekiti wa Halmashauri hiyo  Erasto Makala, ametumia nafasi hiyo kumpongeza Mkurugenzi Mtendaji wa Halmashauri hiyo Regina Bieda kwa usimamizi mzuri wa fedha unaozingatia sheria na kanuni.

Pia amewataka Watendaji wa idara husika kuhakikisha wanahakiki madeni yanayodaiwa na Halmashauri na kulipa madeni yaliyopo kadri ya uwezo wa ndani.

Katika kikao hicho, wajumbe pia waliafiki ombi la Mkurugenzi Mtendaji, Regina Bieda, la kuchangia ada na mahitaji ya mwanafunzi yatima, Narsa Hussein, kutoka kijiji cha Soga ambapo walikubali kuchangia kutokana na umuhimu wa suala hilo.

Halmashauri ya Kibaha inaendelea na juhudi za kuhakikisha kuwa miradi ya maendeleo inatekelezwa kwa ufanisi na kwamba rasilimali za umma zinasimamiwa vyema kwa manufaa ya wananchi.