MAFUNZO YA UBORESHAJI WA DAFTARI LA KUDUMU NA UWEKAJI WAZI TAARIFA ZA MPIGA KURA AWAMU YA PILI YAFANYIKA KIBAHA

Posted on: May 14th, 2025

Halmashauri ya Wilaya ya Kibaha imeendesha mafunzo ya awamu ya pili kuhusu uandikishaji na uwekaji wazi wa Daftari la Kudumu la Wapiga Kura, kuelekea Uchaguzi Mkuu unaotarajiwa kufanyika Oktoba mwaka huu.

Mafunzo hayo yamefanyika leo Mei 16, 2025 katika Ukumbi wa NMB Mlandizi, yakiwa yamefunguliwa rasmi na Afisa Mwandikishaji ngazi ya Jimbo,

Bi. Regina L. Bieda.

Akizungumza wakati wa ufunguzi, Bi. Bieda amewataka washiriki kuzingatia mafunzo hayo kwa umakini ili kwenda kutekeleza majukumu yao kwa weledi, huku wakifuata Sheria, Kanuni na Taratibu zilizowekwa na Tume Huru ya Uchaguzi ya Tanzania.

Kwa nyakati tofauti, Maafisa TEHAMA kutoka Tume Huru ya Uchaguzi Tanzania, Bw. Richard Simon na Bw. Paul Mpangala, wamehimiza washiriki kuhakikisha wanatumia mafunzo hayo kama msingi wa utekelezaji wa kazi kwa kuzingatia misingi ya haki, sheria na kanuni za uchaguzi.

Kwa upande wake, Afisa Uchaguzi wa Halmashauri ya Wilaya ya Kibaha, Bi. Grace Haule, amesema kuwa kutakuwa na jumla ya vituo 19 vya kuhakiki taarifa za wapiga kura katika Halmashauri hiyo, ambapo kila kata itakuwa na angalau kituo kimoja. Aidha, kwa kata zenye idadi kubwa ya watu, vituo vitakuwa viwili hadi vitatu ili kurahisisha zoezi hilo kufanyika kwa ufanisi.

Bi. Haule amewahamasisha wakazi wa Halmashauri ya Wilaya ya Kibaha kujitokeza kwa wingi katika vituo walivyojiandikishia awali, ili kuhakiki taarifa zao kwenye daftari hilo.

Mafunzo hayo yamehitimishwa kwa hotuba ya Afisa Mwandikishaji ambaye amesisitiza kuwa washiriki watumie mafunzo hayo kama nyenzo muhimu katika utekelezaji wa majukumu yao, na pia wahamasishe wananchi kushiriki kikamilifu katika zoezi la uboreshaji wa daftari litakalofanyika kuanzia Mei 16 hadi Mei 22, 2025.