Madiwani Waipongeza Serikali kwa kuwapatia Vishikwambi

Posted on: October 5th, 2023

Madiwani wa Halmashauri ya Wilaya Kibaha wameishukuru Serikali ya awamu ya sita inayoongozwa na Mhe. Samia Suluhu Hassan kwa kuwapatia vishikwambi ambavyo vinakwenda kuwarahisishia utendaji wao katika vikao mbambali.

Akizungumza baada ya kukabidhiwa kishikwambi Diwani wa Mtongani Habiba Mfalamagoa ametoa shukrani  kwa Halmashauri kwa kuona haja ya kununua vishikwambi kwani sasa vinakwenda kupunguza gharama za karatasi kwa ajili ya taarifa za vikao na kuwaondolea mzigo wa kubeba makabrasha.

Naye Diwani wa  Mlandizi Eupharisia Kadala amesema madiwani wamefurahishwa kupata vishikwambi kwani wanaenda na tekinolojia ya sasa ambapo taarifa zao zitahifadhiwa kwa uhakika.

"Miongoni mwa Halmashauri za Kisasa Kibaha nasisi tumo,  nimpongeze sana Mkurugenzi wetu Butamo Ndalahwa kwa kuona Kuna umuhimu wa kuhamia kwenye Teknolojia kama dunia inavyobadilika sasa, pia niipongeze kamati ya fedha kwa kuwa na maono makubwa na kufanikisha jambo hili". Amesema Kadala.

Awali akifungua mafunzo ya namna ya kutumia vishikwambi hivyo kwa madhumuni ya uendeshaji wa vikao,  Mwenyekiti wa Halmashauri Mhe. Erasto Makala amesema wameamua kuhama kutumia nakala ngumu(makaratasi ) na kuhamia kwenye matumizi ya nakala laini(vishikwambi) ili kupunguza gharama za kuzalisha na kusambaza makabrasha.

Amesema Halmashauri imekuwa ikitumia gharama kubwa kwenye uendeshaji wa vikao hususani kwenye eneo la kutoa makabrasha kwa Madiwani kwani wengine wanaishi mbali na makao makuu ya Halmashauri hivyo kuwafikishia makabrasha gharama kubwa za mafuta zilikuwa zinatumika.

Vilevile Makala amesema vishikwambi vitasaidia taarifa kufika kwa madiwani kwa wakati na kurahisisha vikao vyao.