Madeni ya Watumishi na Wazabuni Kupewa Kipaumbele

Posted on: August 30th, 2023

HALMASHAURI ya Wilaya ya Kibaha hadi kufika Juni 30, 2023, ilikuwa imekusanya na kupokea mapato pamoja bakaa Jumla ya Sh. Biln 31,960,714,473.62 Sawa na asilimia 85.78 ya maksio ya Sh. Biln 37,257,763,726.72 .

Hayo yamebainishwa na Mweka hazina wa Halmashauri ya Wilaya ya Kibaha Zubeda Nkala alipokuwa akiwasilisha hesabu za mwisho ( final accounts) za Halmashauri zinazoishia Juni 30, 2023 katika kikao maalum cha Baraza la Madiwani la kujadili taarifa hizo.

Zubeda amesema pamoja na kukusanya kiasi cha Bilion 31.960 Halmashauri imetumia sh. Bilion 25,895,087,172 Sawa na asilimia 81 ya mapato yaliyopokelewa.

Kwa mujibu wa Zubeda  mapato yameongezeka kwa asilimia 9.65 kutoka Sh. Biln.29,146,982,035 mwaka 2021/2022 hadi Sh.Biln. 31,960,714,473 kwa mwaka 2022/2023

Aidha Mweka hazina huyo ameeleza katika kikao hicho kwamba  Halmashauri intarajia kujenga soko la kisasa katika eneo la Mlandizi ili kuwezesha wananchi kupata huduma bora karibu na wanakoishi.

Kaimu katibu Tawala Mkoa wa Pwani Mwajuma Mohamed ameipongeza Halmashauri hiyo kwa kuongeza mapato tofauti na miaka ya nyuma na kuwataka waendelee kuboresha mikakati ya ukusanyaji.

"Nawapongeza kwa kupandisha makusanyo tofauti na miaka ya nyuma najua juhudi mbali mbali zimefanyika wiki iliyopita tulikuwa hapa na GIZ tukifundishwa tukiandaa mikakati mbali mbali ya kuongeza mapato katika Halmashauri hii niwaombe mkazingatie yote tuliyokubaliana " amesema Mwajuma.

Mwajuma amesema lazima hatua stahiki zichukuliwe kwa wadaiwa wa viwanja kulingana na mkataba kwani watu wamekuwa wakishilia viwanja vya Halmashauri kwa zaidi ya miaka sita bila kulipa hivyo alimtaka mwanasheria kusimamia mkataba wa mauzo ya viwanja hivyo.

Akifunga kikao hicho Makamu Mwenyekiti wa Halmashauri ya Wilaya ya Kibaha Mhe. Mwinshehe Shomari amempongeza Mwekahazina kwa maandalizi mazuri ya kitabu hicho kwani kimeandaliwa kwa ufupi kila anaesoma anaelewa .

Vilevile Shomari amesema swala la ukusanyaji wa mapato ni kipaumbele chao na wanatimu imara ya mapato ambayo inafanya kazi kwa ufanisi hadi kupelekea kupanda kwa mapato kwa mwaka 2022/2023.

Amesema swala la kulipa madeni kwa watumishi na wazabuni wamelipa kipaumbele na walishaagiza kila robo taarifa za madeni zitakuwa zinawasilishwa.

Pamoja na kulipa madeni pia wanafuatilia vikundi vyote vilivyochukua mkopo wa Halmashauri na bado hawajarejesha.

Makamu Mwenyekiti  huyo amesema wameshaanza kuchukua hatua za kuvipeleka vikundi hivyo mahakamani.