Mabula Aagiza Halmashauri Kuziwezesha Idara za Ardhi

Posted on: September 26th, 2018

NAIBU Waziri wa Ardhi Anjelina Mabula ametoa agizo kwa Halmashauri kuhakikisha zinawezesha idara za ardhi ziweze kufanya kazi kwa ufanisi.

Mabula ametoa agizo hilo juzi wakati wa ziara yake ya siku moja katika Halmashauri ya wilaya ya Kibaha Mkoani Pwani katika shamba la Soga na Kikongo ambayo yalikua na mgogoro wa muda  mrefu.

Alisema, idara hizo zimekua zikikwama kutekeleza baadhi ya mipango yake kutokana na kukosa fedha ambazo Halmashauri ingeweza kutoa na kufanikisha kinachotakiwa kufanyika.

"Halmashauri nyingi hazitambui umuhimu wa idara ya ardhi hawajui kama ndio kila kitu katika kukuza mapato kwenye maeneo yao, idara hii imekua kama yatima wakati mwingine wataalamu wanashindwa kufika Vijijini kwa kukosa gari changamoto hizi zitafutiwe ufumbuzi wathaminiwe kama idara nyingine" alisema.

Aidha alitoa wito kwa idara za ardhi kufanya utambuzi wa wamiliki wa Ardhi kwani kwa kufanya hivyo itasaidia kuongeza mapato ikiwa ni pamoja na kuwawezesha wananchi kuwa na  hatimiliki ya ardhi.

" Viwanja vyote viewe kwenye mfumo ili ufuatiliaji wa mapato uwe rahisi, taarifa za madeni pia ziwe kwenye mfumo itarahisisha hata ukusanyaji wa  mapato kwenye idara yenu" alisema.

Naibu Wazir huyo akitembelea katika shamba lilipo Soga ambalo linamilikiwa mwekezaji na halijaendelezwa kwa muda mrefu na baadhi ya wannchi wakiwa wameweka makazi katika shamba hilo.

Alisema, wapo wananchi ambao wamekua wakiishi ndani ya shamba hilo  tangu mwaka 1975 hivyo hawawezi kutolewa kwani tayar Kijiji kinatambulika.

Alisema, mchakato wa kufuta ama kuendelea kuacha shamba hilo kwa mwekezaji unaendelea lakini wananchi wanaoishi hapo hawataondolewa.

Awali mwenyekiti wa Kipangege Shomari Juma alimueleza Waziri huyo kuwa walikua wanashindwa kulima kutokana na eneo hilo kudaiwa ni la mwekezaji.

Aidha kabla ya tamko la Waziri huyo kwa wananchi kuendelea kuishi katika shamba hilo mmoja wa wanakijiji Subira Juma alisema, walikua wakikamatwa na kunyanyaswa Kutokana na kuishi ndani ya shamba hilo.

Wananchi hao walimshukuru Waziri huyo kwa tamko hilo ambalo litawaweka huru kuendelea kufanya shughuli zao za maendeleo.