MAAMBUKIZI YA MALARIA YAPUNGUA KIBAHA DC, WAKAZI ZAIDI YA ELFU 95 KUNUFAIKA NA VYANDARUA BURE

Posted on: August 26th, 2025

Halmashauri ya Wilaya ya Kibaha imemaliza zoezi la uandikishaji wa wakazi wake kwa ajili ya ugawaji wa vyandarua.

Akizungumza katika kikao kazi leo, Agosti 26, 2025, Kaimu Mganga Mkuu wa Halmashauri hiyo, Dkt. Festo Lyimo, amesema hadi sasa zaidi ya wakazi 95,000 wameandikishwa kwenye kanzidata ya Wizara ya Afya kupitia Idara ya Bohari ya Dawa (Medical Stores Department - MSD).

Kwa upande wake, Mratibu wa Malaria wa Halmashauri ya Wilaya ya Kibaha, Daniel Mwita, amesema zoezi la uandikishaji limevuka lengo na kufikia asilimia 103.

Mwita alitoa taarifa hiyo fupi kuhusu uandikishaji na hali ya malaria katika Halmashauri, akibainisha kuwa kiwango cha maambukizi ya malaria kimepungua na kufikia asilimia 5.2. Hali hiyo imetokana na utekelezaji wa afua mbalimbali, ikiwemo unyunyiziaji wa dawa za kuua viluilui na ugawaji wa vyandarua kwa wananchi.

Awali, akifungua kikao kazi hicho, Mkurugenzi Mtendaji wa Halmashauri ya Wilaya ya Kibaha, Bi. Regina L. Bieda, aliishukuru Serikali kupitia Wizara ya Afya na TAMISEMI kwa juhudi za kupambana na malaria kwa kuleta afua mbalimbali, ikiwemo ugawaji wa vyandarua bure kwa wananchi.

Naye Meneja wa MSD Kanda ya Dar es Salaam, Bi. Betia Kaema, amesema ugawaji wa vyandarua unatarajiwa kuzinduliwa katika Mkoa wa Pwani tarehe 8 Septemba 2025, mara baada ya halmashauri zote mkoani humo kukamilisha zoezi la uandikishaji.

Akihitimisha kikao kazi hicho, Bi. Regina L. Bieda aliwataka waratibu wa malaria, watendaji wa kata na vijiji kusimamia kwa umakini zoezi la ugawaji wa vyandarua kwa kuzingatia hali ya kijiografia ili kila mwananchi aweze kunufaika.

Aidha, aliwapongeza wahudumu wa afya ngazi ya jamii kwa mchango wao katika kupambana na malaria na kuwatunuku vyeti pamoja na zawadi ndogo za fedha kama ishara ya kutambua kazi yao kwa jamii.