KIBAHA DC YAIMARISHA UFANISI KWA WATUMISHI KUPITIA MAFUNZO YA MFUMO WA ESS

Posted on: June 12th, 2025

Katika kuhakikisha ufanisi na uwajibikaji kwa watumishi wa umma, Halmashauri ya Wilaya ya Kibaha imeendesha mafunzo ya matumizi ya Mfumo wa Utumishi wa Umma (ESS) kwa watumishi wake wote, yaliyofanyika tarehe 11 Juni 2025 katika Ukumbi  wa Halmashauri hiyo.

Akifungua rasmi mafunzo hayo, Mkurugenzi Mtendaji wa Halmashauri hiyo, Bi. Regina L. Bieda, amewataka watumishi kutumia mfumo huo kwa weledi na kujaza majukumu yao ya kila siku kwa usahihi, ili kuimarisha utendaji kazi na kuwezesha tathmini sahihi ya uwajibikaji wao.
“Serikali ya awamu ya Sita inayoongozwa na Mheshimiwa Rais Dkt. Samia Suluhu Hassan imeweka mazingira rafiki ya kazi kupitia mfumo huu wa ESS, lengo likiwa ni kurahisisha upatikanaji wa huduma kwa mtumishi na kuongeza ufanisi katika sekta ya umma,” alisema Bi. Bieda.

Kwa upande wake, Afisa TEHAMA wa Halmashauri hiyo, Bw. Menard Mvimbile, amesisitiza umuhimu wa kufuata maelekezo ya matumizi ya mfumo huo na kuwahimiza watumishi wote kuwasiliana na idara husika pindi wanapokutana na changamoto zozote.
Bw. Mvimbile alitoa mafunzo ya namna ya kujaza majukumu ya kila siku pamoja na taratibu za kuwasilisha maombi ya likizo kwa njia ya kielektroniki kupitia mfumo wa ESS.

Aidha, Afisa  Utumishi wa Halmashauri Edward Masona  aliwataka watumishi kuzingatia maadili ya kazi, kutokujihusisha na vitendo vya rushwa, uzembe na uchelewaji kazini, akibainisha kuwa mfumo huu utaongeza uwazi na uwajibikaji.

Watumishi waliopata fursa ya kushiriki mafunzo hayo, akiwemo Janeth Mndeme na Abel Mlelwa, wameeleza kufurahishwa na mafunzo hayo wakisema yamewajengea uelewa mpana kuhusu matumizi ya mfumo wa ESS, tofauti na awali ambapo walikuwa na changamoto nyingi katika kuutumia.
Mafunzo hayo ya siku moja yalihitimishwa kwa Mkurugenzi Bi. Regina L. Bieda kukusanya changamoto zote zilizowasilishwa na kuahidi kuzifanyia kazi kwa kushirikiana na taasisi husika ili kuhakikisha mfumo unafanya kazi kwa tija na ufanisi mkubwa zaidi.