JUKWAA LA WANAWAKE KIBAHA DC LAFANYA UCHAGUZI, DKT. MAIMUNA AIBUKA MWENYEKIT

Posted on: June 23rd, 2025

 Wanawake wa Halmashauri ya Wilaya ya Kibaha kupitia Jukwaa lao la maendeleo wamefanya uchaguzi wa viongozi wapya watakaoliongoza jukwaa hilo kwa kipindi cha miaka mitatu ijayo, ambapo Dkt. Maimuna M. Yusuph ameibuka mshindi wa nafasi ya Mwenyekiti kwa kupata kura 33 kati ya 52 zilizopigwa.

Uchaguzi huo umefanyika katika Ukumbi  wa Halmashauri na kusimamiwa na Mratibu kutoka Idara ya Maendeleo ya Jamii, Bi. Diana Brandus, aliyebainisha kuwa nafasi zilizogombewa ni Mwenyekiti, Makamu Mwenyekiti, Katibu, Katibu Msaidizi na Mweka Hazina.

Katika matokeo mengine ya uchaguzi huo, Leah Mahonya alichaguliwa kuwa Makamu Mwenyekiti kwa kura 27, huku Lina Chamba akinyakua nafasi ya Katibu kwa kura 33.

Mariamu Mbuganj alipata ushindi wa kishindo katika nafasi ya Katibu Msaidizi kwa kura 51, na Zuwena Kibwana Ramadhani aliibuka Mweka Hazina kwa kura 27.

Uchaguzi huo ulitanguliwa na elimu ya kisheria iliyotolewa na Mwanasheria wa Halmashauri, Bi. Yasmini Makanya, aliyewataka wanawake kujitambua na kusimamia haki zao katika masuala ya talaka, mirathi, uandishi wa wosia, na mgawanyo wa mali baada ya

kuvunjika kwa ndoa.

“Ni muhimu wanawake wakajua haki zao ili waweze kuishi kwa heshima, usawa na usalama katika jamii,” alisisitiza Bi. Makanya.

Kwa upande wake, Afisa Maendeleo ya Jamii wa Halmashauri, Bw. Lawrence Mishinga, aliwahimiza wanawake kutumia fursa ya uwepo wa jukwaa hilo kujikomboa kiuchumi kupitia ujasiriamali na mikopo inayotolewa na Halmashauri kupitia asilimia 10 ya mapato ya ndani.

“Epukeni mikopo inayodhoofisha mitaji yenu – mikopo ya ‘kausha damu’. Jipangeni, jikusanyeni, na tumieni fursa zilizopo kuleta maendeleo yenu binafsi na ya taifa kwa ujumla,” alisema Bw. Mishinga.

Jukwaa la Wanawake Kibaha DC lilianzishwa rasmi mwaka 2021 na uchaguzi wa sasa ni wa pili kufanyika tangu kuanzishwa kwake. Jukwaa hilo limeendelea kuwa sauti ya mwanamke katika masuala ya kijamii, kisiasa, kiuchumi na mapambano dhidi ya ukatili wa kijinsia pamoja na maambukizi ya VVU/UKIMWI.