Halmashauri ya Wilaya ya Kibaha yakabidhiwa Gari la Wagonjwa

Posted on: January 26th, 2024

HALMASHAURI ya Wilaya ya Kibaha imepokea gari ya wagonjwa ambayo itatumika katika Hospitali ya Wilaya hiyo na kuondoa kero iliyokuwepo awali iliyosababishwa na uhaba wa magari hayo.

Kwasasa Halmashauri ya Wilaya Ina magari manne ya wagonjwa awali changamoto zaidi ilikuwa katika kituo cha afya Mlandizi ambacho kipo Mjini na kinahudumia wagonjwa wengi zaidi

Akikabidhi gari hilo kwa  Mkurugenzi wa Halmashauri hiyo Mbunge wa Jimbo la Kibaha Vijijini Michael Mwakamo  alitaka gari hilo kutumika kwa malengo yaliyokusudiwa Ili lidumu kwa muda mrefu.

Mwakamo  aliwataka watendaji kutotumia gari hilo kama daladala kwa ajili ya kwenda kazini badala yake waendelee kutumia bajaji na usafiri mwingine.

"Gari hili linakuja kuondoa changamoto ya uhaba wa magari iliyokuwepo awali, litumike kwa malengo yaliyokusudiwa Ili kuendelea kuwasaidia wagonjwa," alisema.

Mwakamo alijivunia jitihada zake za kuleta maendeleo katika Jimbo hilo huku akiishukuru Serikali kwa namna inavyotoa fedha na vitendea kazi kumaliza kero za Wananchi.

Ametaka pia Wananchi kuwapima viongozi kwa kazi wanazofanya hususani za kuondoa vikwazo vya maendeleo kwenye maeneo yao kama inavyofanya Serikali ya awamu ya sita.

" Rais Dk.Samia Suluhu Hassan tunamshukuru kwa namna ambavyo ameendelea kubadilisha Jimbo letu kwa maendeleo kila sekta ameigusa anatufanya tujivunie kwa wananchi wetu " alieleza.

Mganga Mkuu wa Halmashauri hiyo Dk.Wilford Kondo alisema kwamba hakuna mgonjwa atakayetizwa fedha kwa huduma ya gari hilo la wagonjwa na kwamba atakayedaiwa fedha ya mafuta atoe taarifa.

 Dk Kondo aliwataka Wananchi kufika kupata huduma katika Hospitali ya Wilaya kwani huduma nyingi kwasasa zinapatikana katika Hospitali hiyo tofauti na awali ambapo ilikuwa lazima mgonjwa apewe rufaa kwenda Hospitali ya Rufaa ya Mkoa wa Pwani Tumbi.

Diwani wa Mlandizi Euphrasia Kadala akiishukuru Serikali kwa kutoa gari hilo la wagonjwa kwa ajili ya Hospitali ya Wilaya  ambalo sasa litakwenda kuondoa adha ya kukodi magari pindi lililopo linapopata hitilafu.

Tatu Haji na John Pilly ni wakazi wa Mlandizi ambao wanaishukuru Serikali kwa ajili ya gari hilo litakalosaidia kuhudumia wagonjwa kwa haraka.

Mwisho