Halmashauri ya Wilaya ya kibaha Imefanya Maadhimisho ya siku ya afya ya Kijiji

Posted on: July 5th, 2022

Wakazi wa Kijiji cha Kwala Halmashauri ya Kibaha wameiomba Serikali kupatiwa huduma ya upimaji wa saratani ya shingo ya kizazi ambayo kwasasa haipatikani kwenye Zahanatiyao. Ombi hilo limetolewa jana katika kijiji hicho wakati wa maadhimisho ya siku ya afya ya kijiji ambayo huazimishwa kila robo ya mwaka ambapo  wataalam wa afya wanapeleka huduma za upimaji wa afya kwenye kijiji kimoja na kuendesha huduma ya upimaji bure zikiambatana na kutoa ushauri wa matibabu. Aidha wananchi hao wameipongeza Serikali kwa kuadhimisha siku ya afya ya kijiji katika kijiji chao ambayo imewapa fursa ya kupata huduma nyingi ambazo hazipatikani katika Zahanati ya Kwala . Mariam Salum Mateke ni moja wa wakazi wa Kwala ameishukuru Serikali kwa kufikisha  huduma ya upimaji na kuwezesha wanawake wengi kupima saratani ya shingo ya kizazi huduma ambayo haipatikani kwenye zahanati ya zahanti ya Kijiji chao. Naye Omary Bakari ameipongeza Serikali kwa kufikisha huduma vipimo karibu na wananchi kwani wapo waliokuwa wakihitaji vipimo hivyo lakini hawakuvipata kwa wakati na huduma hiyo imekuwa ikifanyika kwa nadra. Kaimu Mganga Mkuu wa Halmashauri Dkt. Wiliford Kyondo amesema huduma zote za vipimo ambavyo wananchi wameomba vitapatikana hivi karibuni katika kituo cha afya kwala ambacho kinajengwa kwa fedha za tozo na sasa kipo kwenye hatua ya ukamishaji Awali akizungumza kwenye maadhimisho hayo mratibu wa  mama na mtoto wa Halmashauri hiyo Maria Kahema amesema huduma mseto zilitolewa kwa makundi yote ya wazee wanawake na vijana. Maria amesema lengo  la siku ya afya ya kijiji ni kuwajengea  wananchi tabia ya kupima afya zao hata kama hawaumwi kwani wengi wao hawana desturi ya kuchunguza afya wanasubiri hadi waumwe ndio waende kufanya uchunguzi kwenye vituo vya huduma za afya. “Katika siku hii tumeitumia kuwafundisha wananchi afya  ya uzazi na mtoto kwani tunatamani mama anaebeba ujauzito ajifungue salama yeye na mtoto mtoto wake, hivyo tuliwaeleza wananchi changamoto zinazosababisha mama mjamzito kupoteza maisha” alisema Maria ameongeza wamefanya kipimo cha saratani ya mlango wa kizazi kwa wanawake kwani tatizo hilo limekuwa kubwa kulingana na takwimu walizozipata walipoenda kwenye vijiji vingine ndani ya halmashauri ya Wilaya ya Kibaha. “Tumeona tutumie fursa  hii  kupima saratani ya shingo ya kizazi kwa wanawake kwani kipimo hiki hakipatikani kwenye zahanati ya Kwala waliogundulika na viashiria wataenda kutibiwa kwenye kituo cha afaya Mlandizi”alisema Maria Rehema Rashidi Mwenyekiti wa Huduma za Jamii kijiji cha Kwala ameishukuru Serkali kw akuleta huduma za upimaji wa saratani kwenye kijiji chao kwani huduma hiyo haipatikani kwenye zahanati yao ya kwala, itafutwe namna ya  vipimo vyote vipatikane kwenye zahanati yao ili wanawake wapate huduma hiyo mara kwa mara.