HALMASHAURI YA KIBAHA YAZINDUA ZOEZI LA UNYUNYIZIAJI VIUADUDU KUDHIBITI MALARIA

Posted on: June 17th, 2025

Halmashauri ya Wilaya ya Kibaha imezindua rasmi zoezi la unyunyiziaji viuadudu katika mazalia ya mbu, ikiwa ni jitihada za kudhibiti na kutokomeza ugonjwa wa malaria katika maeneo mbalimbali ya wilaya hiyo.

Uzinduzi wa zoezi hilo umefanyika katika Kata ya Janga, iliyopo Tarafa ya Mlandizi, ambapo zoezi hilo litaendelea katika kata nyingine 13, na hivyo kufikia jumla ya

kata 14 zinazolengwa.

Katika zoezi hilo, Halmashauri imepokea lita 3,000 za viuadudu kutoka Serikali Kuu, ambazo zitatumika kunyunyizia kwenye mazalia ya mbu ili kuvunja mzunguko wa uzalishaji wa mbu waenezao malaria.

Akizungumza wakati wa uzinduzi huo Mratibu wa maleria , Daniel Mwita alisisitiza kuwa matumizi ya viuadudu ni njia salama, rafiki kwa mazingira na yenye ufanisi mkubwa katika kupambana na mbu waenezao malaria.

Kwa upande wake, Kaimu Mganga Mkuu wa Halmashauri ya Wilaya ya Kibaha, Dkt. Festo Lyimo, aliwasihi wananchi kutoa ushirikiano wa kutosha kwa wataalamu wa afya na viongozi wa kata ili kufanikisha kikamilifu zoezi hilo muhimu.

Kaulimbiu ya kampeni hiyo ni: "Malaria inatokomezwa na sisi – Wekeza, Chukua Hatua, Ziro Malaria inaanza na mimi."