Benki ya CRDB yatoa Msaada wa Madawati 50 kwa Shule ya Sekondari Samia Mtongani

Posted on: May 31st, 2024

BENKI  ya CRDB imekabidhi madawati 50 yenye thamani ya milion tano kwa shule ya sekondari  ya Samia Mtongani iliyopo kata ya Mtongani Mlandizi Halmashauri ya Wilaya ya Kibaha.

 Mkurugenzi Mtendaji wa Halmashauri ya Wilaya ya Kibaha Regina Bieda akizungumza baada ya kupokea madawati hayo amewaasa wanafunzi wa shule hiyo kusoma kwa bidii na kutokuruhusu ndoto zao zikatishwe na mtu mwingine.

Bieda amewapongeza waalimu wa shule hiyo kwa jitihada wanazofanya katika kuwakuza watoto hao kielimu na kuwataka waongeze juhudi katika ufundishaji ili kuleta matokeo mazuri yatakayoendana na Jina la Samia.

Aidha aliwashukuru benki ya CRDB kwa kutoa msaada wa madawati hayo .

"Sisi tumefarijika kupokea madawati haya kwani tulikuwa na changamoto ya madawati lakini leo kwa msaada huu tatizo la madawati linaenda kupungua," amesema Bieda.

Pia ameitaka uongozi wa benki hiyo kuendeleza ushirikiano kwani bado kuna uhitaji wa vitu vingi na kuwaahidi kutoa ushirikiano pale watakapohitajika katika kufikia mipango ya maendeleo.

Akizungumza katika hafla hiyo Meneja wa CRDB tawi la Mlandizi Mamertus Gabriel Luena amesema benki inashirikiana na wananchi katika maendeleo na wameona ili wanafunzi watimize ndoto zao si vemawakakaa chini .

Amesema kutokana na hali hiyo wameamua  kutoa madawati hayo 50 yenye thamani ya milioni tano na kuwataka wanafunzi wasome kwa bidii ili kutimiza ndoto zao.

Luena amewataka waalimu kufundisha kwa bidii  ili kuleta matokeo mazuri kwani wakifanya vizuri benki itaendelea kuwafanyia makubwa zaidi.

Wanafunzi wa shule hiyo wameishukuru benki ya CRDB kwa kuwapa msaada wa madawati kwani itaenda kuwapunguzia uhaba wa madawati kwenye shule yao na kuwaahidi kwenda kusoma kwa bidii